ئه‌توانى له‌رێگاى ئیمه‌یڵ و ژماره ته‌له‌فۆنه‌کانمانه‌وه په‌یوه‌ندیمان پێوه‌بکه‌یت و راوسه‌رنج وپێشنیارو داواکاریه‌کانى خۆت بخه‌یته‌روو.
07705066052
نێچرڤان بارزانى : گه‌لى کوردستان ئاشتیخوازه‌و کراوه و به‌خشنده‌یه
11/27/2017 5:19:00 PM
جەماوەر نیوز
جه‌ماوه‌رنیوز
له ده‌یه‌مین ڕێوڕه‌سمى ساڵانه‌ى ڕاگه‌یاندنى هه‌ڵمه‌تى نیشتمانیى بۆ بنبڕکردنى توندوتیژى دژى ژنان له هه‌رێمى کوردستان نێچیرڤان بارزانى سه‌رۆک وه‌زیرانى هه‌رێمى کوردستان وته‌یه‌کى پێشکه‌ش کرد، تیایدائاماژه‌ى به‌وه کرد که وێڕاى بارودۆخى سه‌ختى هه‌رێم و ڕووداوه دژواره‌کانى ئه‌م دواییه، هاوشانى حکوومه‌ت و ڕێکخراوه‌کانى کۆمه‌ڵگه‌ى مه‌ده‌نى له سه‌رانسه‌رى جیهان ئیراده‌ى سیاسییان بۆ دابینکردنى ئاشتى و سه‌قامگیرى دووپات ده‌که‌نه‌وه و کار و چالاکییه‌کانیان به ئامانجى نه‌هێشتنى توندوتیژى له‌ناو خێزان و کۆمه‌ڵگه و له‌سه‌ر ئاستى نیشتمانى و ناوچه‌که، چڕتر ده‌که‌ن و ئه‌مساڵیش جه‌خت له ئیراده‌ى ده‌سه‌ڵاتى سیاسیى کوردستان و خه‌ڵکى کوردستان بۆ ئازادى و یه‌کسانى و ئاشتى و سه‌قامگیرى ده‌که‌نه‌وه.
ئه‌مه‌ش ده‌قى وتارى به‌ڕێز سه‌رۆک وه‌زیرانى هه‌رێمى کوردستانه:
میوانه به‌ڕێزه‌کان، ئاماده‌بووانى به‌ڕێز،
ڕۆژتان باش..
به‌خێر بێن بۆ ڕێوڕه‌سمى ڕاگه‌یاندنى هه‌ڵمه‌تى نیشتمانیى ئه‌مساڵمان بۆ بنبڕکردنى توندوتیژى دژى ژنان له هه‌رێمى کوردستان.
ئه‌مساڵ ده‌یه‌مین ساڵه ئێمه له هه‌رێمى کوردستان هه‌ڵمه‌تى نیشتمانى ڕاده‌گه‌یه‌نین بۆ به‌ره‌نگاربوونه‌وه‌ى توندوتیژى و دابینکردنى یه‌کسانى و دادوه‌ریى کۆمه‌ڵایه‌تی. سه‌ره‌ڕاى ڕووداوه دژواره‌کانى ئه‌م دواییه، سه‌ره‌ڕاى بارودۆخى سه‌ختى هه‌رێمى کوردستان، ئه‌مساڵیش وه‌کو ساڵانى ڕابردوو، هاوشانى حکوومه‌ت و ڕێکخراوه‌کانى کۆمه‌ڵگه‌ى مه‌ده‌نى له سه‌رانسه‌رى جیهان، ئێمه ئیراده‌ى سیاسیمان دووپات ده‌که‌ینه‌وه بۆ دابینکردنى ئاشتى و سه‌قامگیرى له هه‌رێمى کوردستان، کار و چالاکییه‌کانمان چڕتر ده‌که‌ین به ئامانجى نه‌هێشتنى توندوتیژى له‌ناو خێزان و کۆمه‌ڵگه و له‌سه‌ر ئاستى نیشتمانى و ته‌واوى ناوچه‌که.
ئه‌مساڵ به پێویستى ده‌زانم جه‌خت له ئیراده‌ى ده‌سه‌ڵاتى سیاسیى کوردستان و خه‌ڵکى کوردستان بکه‌مه‌وه بۆ ئازادى و یه‌کسانى و ئاشتى و سه‌قامگیری.
گومانى تێدا نییه که هه‌رێمى کوردستان ئه‌مساڵ به بارودۆخێکى دژوار و ناهه‌موادا تێده‌په‌ڕێت. ڕووداوه‌کانى ئه‌م چه‌ند مانگه‌ى ڕابردووش به کرده‌نى ده‌یسه‌لمێنن که گه‌لى کوردستان، گه‌لێکى ئاشتیخوازه، گه‌لێکى کراوه و به‌خشنده‌یه و هه‌میشه به‌رگرى له‌خۆى ده‌کات، به‌ڵام هه‌رگیز توندوتیژى به‌کار ناهێنێت بۆ چاره‌سه‌رکردنى کێشه‌کان و دابینکردنى مافه بنه‌ڕه‌تییه سیاسى و مه‌ده‌نى و مرۆییه‌کانی، به‌ڵکو ده‌یه‌وێ به شێوازى دیموکراسى و به شێوازێکى ئاشتییانه بگاته ئه‌و مافانه‌ی که خه‌باتى بۆى کردووه.
دیاره له هه‌موو جیهاندا هه‌ر کاتێک بارودۆخى سیاسى و ئابوورى ده‌شێوێ، ژنان باجێکى گه‌وره ده‌ده‌ن، نه‌ک ته‌نیا ده‌بنه قوربانیى سه‌ره‌کیى شه‌ێ و هێرشه‌کان، به‌ڵکو مافه ڕه‌واکانیان که کاریان له‌سه‌ر کردووه، پێشێل ده‌کرێنه‌وه و کار و چالاکییه‌کان سست ده‌بن و پرۆسه‌ى یه‌کسانى و دادوه‌رى ده‌چێته دواوه.
به‌ڕێزان..
ئێمه ئه‌مڕۆ لێره به هاوکاریى سه‌رجه‌م ژنانى کوردستان دووپاتى ده‌که‌ینه‌وه که لێناگه‌ڕێین مافه‌کانتان بچنه دواوه، لێناگه‌ڕێین جارێکى دیکه ببنه‌وه قوربانیى سه‌ره‌کیى شه‌ێ و پێکدادانه‌کان. ئێمه به‌ڵێن ده‌ده‌ین که ئه‌و پێشکه‌وتنانه‌ى له (25) ساڵى ڕابردوودا به‌ده‌ستمان هێناون، به‌رده‌وام ده‌بن و حکوومه‌تى هه‌رێمى کوردستانیش وه‌ک هه‌میشه هاوکارى نزیکتان ده‌بێت.
له ماوه‌ى (25) ساڵى ڕابردوودا ئێمه کارى جددیمان کردووه له‌سه‌ر پرسى ژن و سیاسه‌تى کۆمه‌ڵایه‌تى له هه‌رێمى کوردستان، چونکه باوه‌ڕمان به‌وه هه‌یه که دابینکردنى ئاسایش و یه‌کسانى و دادوه‌رى ده‌بێته بناغه‌ى ئه‌ساسیى کارکردنمان، باشترین ده‌روازه‌ن به‌ره‌و ژیانێکى ئارام و کوردستانێکى ئازاد بۆ سه‌رجه‌م هاووڵاتییانى که له هه‌رێمى کوردستان ده‌ژین. هه‌ر له‌م باوه‌ڕه‌وه، به ڕاوێژکارى و گوێگرتن له پسپۆێ و چالاکوان و داکۆکیکارانى یه‌کسانى و مافى مرۆڤ، کارمان کردووه بۆ چاکسازیى یاسایى و سیاسه‌ت و ستراتیژییه‌تمان داڕشتووه.
له‌ڕووى یاساییه‌وه، له ساڵانى نه‌وه‌ده‌وه تا ئێستا کۆمه‌ڵێک مادده‌ى هه‌ردوو یاساى سزاى عێراقى و یاساى بارى که‌سیێتیمان گۆڕیوه. جگه له‌مانه‌ش، په‌رله‌مانى هه‌رێمى کوردستان به ڕاوێژکارى و گوێگرتن له په‌رله‌مانتارانى ئافره‌ت له هه‌موو حیزب و لایه‌نه‌کان، چه‌ند یاسایه‌کى هاوچه‌رخ و شارستانییان ده‌رکردووه.
له‌وانه‌یه لێره‌دا پێویست بکات زۆر به کورتى باسى ئه‌و ڕیفۆرم و یاسایانه بکه‌م. له ساڵى ٢٠٠١وه له هه‌رێمى کوردستان کوشتنى ژن جا به هه‌ر پاساوێک بێت، وه‌کو هه‌موو کوشتنێکى دیکه مامه‌ڵه‌ى له‌گه‌ڵدا ده‌کرێت، نه‌ک به گوێره‌ى مادده‌ى (٣٧٧) و مادده‌کانى (١٢٨) و (١٣٠) و (١٣١) و (١٣٢) له یاساى سزاى عێراقی، که تاوانباران به کوشتنى ژن به حوکمى خه‌فیف سزا ده‌دات. دوابه‌دواى ئه‌مه، فره‌ژنى له هه‌رێمى کوردستان به‌پێى یاسا و کۆمه‌ڵێک مه‌رجى قورس تا ڕادده‌یه‌کى زۆر سنووردار کراوه. هه‌روه‌ها ته‌مه‌نى شووکردنى به‌رز کرده‌وه بۆ (18) ساڵ وه‌کو مافێکى بنه‌ڕه‌تى و له‌پێناوى ئه‌وه‌ى کچان بتوانن گه‌شه به خوێندن و گه‌شه‌سه‌ندنى خۆیان بده‌ن له‌م ولاته‌دا.
یاساى ژماره (8)ى به‌ره‌نگاربوونه‌وه‌ى توندوتیژیى خێزانى ساڵى ٢٠١١ هه‌نگاوێکى دیکه بوو به‌ره‌و دابینکردنى یه‌کسانى و دادپه‌روه‌ریى کۆمه‌ڵایه‌تی. هه‌روه‌ها پێش ئه‌و یاسایه‌ش، په‌رله‌مانى کوردستان یاساى ژماره (6)ى ساڵى ٢٠٠٨ى ده‌رکرد، که تایبه‌ته به به‌کارهێنانى ئامرازه‌کانى په‌یوه‌ندیکردن و مۆبایل و ئینته‌رنێت. ئه‌م یاسایه هه‌نگاوێکى سه‌رده‌مییانه بوو بۆ پاراستنى ئافره‌ت له هه‌ڕه‌شه و شه‌ڕپێفرۆشتن و هه‌وڵى که‌سانى به‌دکار له ڕێگاى ته‌کنه‌لۆژیاى مۆدێرنه‌وه، له ڕێگاى مۆبایل و ئینته‌رنێته‌وه، بۆ زڕاندنى ناو و ئابڕووى ئافره‌ت، که زۆر جار به‌داخه‌وه بۆته هۆى ئه‌وپه‌ڕى توندوتیژى و گۆشه‌گیرى و ته‌نانه‌ت که‌یسى کوشتنیشى لێکه‌وتۆته‌وه.
له ڕووى سیاسه‌ت و ستراتیژییه‌وه، کاره‌کانمان ده‌یسه‌لمێنن که ئێمه هه‌ر له سه‌ره‌تاوه به کرده‌وه و به شێوه‌یه‌کى سیسته‌ماتیک کارمان له‌سه‌ر ئه‌م پرسه گرنگه‌ى کۆمه‌ڵگه کردووه.
دامه‌زراندنى به‌ڕێوه‌به‌رایه‌تییه‌کانى به‌ره‌نگاربوونه‌وه‌ى توندوتیژى و دامه‌زراندنى چه‌نده‌ها شێڵته‌ر بۆ داڵده‌دانى ژنانى هه‌ڕه‌شه‌لێکراو و دامه‌زراندنى ئه‌نجومه‌نى باڵاى کاروبارى خانمان و بۆردى چاودێریى مافه‌کانى ژن، هه‌نگاوى کرده‌نیى حکوومه‌تى هه‌رێمى کوردستان بوون بۆ به‌دامه‌زراوه‌ییکردنى پرسى ژن، به ئامانجى بنبڕکردنى توندوتیژى دژى ئافره‌تان و چاککردنى دۆخى کۆمه‌ڵایه‌تی.
له پێداچوونه‌وه‌ى ستراتیژییه‌ت و کاره‌کانماندا، خۆشحاڵ بووم که بینیم ئه‌م ده‌زگایانه ڕۆژانه کارى پێویست و گرنگ ئه‌نجام ده‌ده‌ن بۆ گه‌یشتن به ئامانجه‌کانمان. دیاره ئه‌و بارودۆخه‌ى له دواى هاتنى داعش و گرژییه‌کان و هێرشه‌کانى ئه‌م دواییه‌ى هێزه عێراقییه‌کان هاتۆته ئاراوه، لێنه‌گه‌ڕاوه له بوارى جێبه‌جێکردن، کاره‌کانمان له ئاستى چاوه‌ڕوانییه‌کانماندا بن.
سه‌ره‌ڕاى دروستکردنى ته‌گه‌ره له‌به‌رده‌م ده‌سه‌ڵاتى جێبه‌جێکردن، هێرشه‌کانى ئه‌م دواییه بۆ سه‌ر هاووڵاتیان له هه‌رێمى کوردستان و قه‌یرانه‌کانى سووریا و عێراق، کێشه‌یه‌کى دیکه‌ى مرۆیى و گه‌وره‌ى بۆ هه‌رێمى کوردستان دروست کرد، ئه‌ویش کێشه‌ى ئاواره و په‌نابه‌رانه.
سه‌ره‌ڕاى دۆخى سه‌ختى هه‌رێمى کوردستان، ئێمه هه‌ر له سه‌ره‌تاوه به سنگێکى فراوانه‌وه پێشوازیمان له ئاواره و په‌نابه‌ران کردووه و له ماوه‌ى چوار ساڵى ڕابردوودا، دوو ملیۆن ئاواره و په‌نابه‌رمان داڵده داوه له هه‌رێمى کوردستاندا. دواى هێرشى هێزه عێراقییه‌کان بۆ سه‌ر که‌رکووک و خورماتوو و ناوچه‌کانى دیکه، زیاتر له (160) هه‌زار که‌سى دیکه ئاواره بوون و ڕاپۆرته‌کانى کۆمه‌ڵگه‌ى مه‌ده‌نیش پێمان ده‌ڵێن که ژنان و کچان به‌ره‌وڕووى توندوتیژى بوونه‌ته‌وه.
ئێمه به‌دواداچوون له‌م که‌یسانه ده‌که‌ین و داوا له هێزه پێشکه‌وتنخوازه‌کانى عێراق و کۆمه‌ڵگه‌ى نێوده‌وڵه‌تى ده‌که‌ین هاوکارمان بن بۆ سزادانى تۆمه‌تباران و قه‌ره‌بووکردنه‌وه‌ى ئه‌و ژنانه، هه‌روه‌ها داوایان لێده‌که‌ین که هاوکاریى ئاواره‌کان بکه‌ن تا بتوانن بگه‌ڕێنه‌وه زێدى خۆیان.
گرژى و په‌یوه‌ندییه‌کانى ناوخۆش کاریگه‌ریى نه‌رێنییان هه‌بووه و به‌ڵێن ده‌ده‌ین که ئێمه هه‌میشه ئاشتى و ئاسایشى کوردستان ده‌پارێزین و کارده‌که‌ین بۆ یه‌کگرتوویى و ته‌بایی.
ئێمه بڕوامان وایه که ده‌بێ له به‌ره‌نگاربوونه‌وه‌ى توندوتیژیدا، هه‌موو جیاوازییه حیزبى و سیاسییه‌کانمان بخه‌ینه لاوه و به باوه‌ێ و ئیراده‌یه‌کى پته‌و پێکه‌وه کار بکه‌ین، چونکه هه‌روه‌ک له سه‌ره‌تادا گوتم، ئه‌م پرسه به ته‌نیا پرسى ژن نییه، به‌ڵکو پرسى هه‌موو کۆمه‌ڵگه‌یه و ئاشتى و ئاسایشى کوردستان به ئاشتى و ئاسایشى ده‌روونى و ناوماڵ و خێزانه‌وه به‌نده. له هه‌مووى گرنگتر، له کارکردن له‌سه‌ر ئه‌م مه‌سه‌له هه‌ستیاره، ده‌بێ ئێمه باوه‌ێ و قه‌ناعه‌تى شه‌خسیى خۆمان بخه‌ینه لاوه و به‌رنامه و کارى حکوومه‌ت وه‌کو ئه‌رک جێبه‌جێ بکرێن.
هه‌ڵمه‌تى ئه‌مساڵ هاوکاته له‌گه‌ڵ هه‌ڵمه‌تێکى جیهانیى له‌لایه‌ن ئافره‌تانه‌وه بۆ به‌ره‌نگاربوونه‌وه‌ى هه‌راسانکردنى سێکسى له شوێنى کار و له‌لایه‌ن پیاوانى خاوه‌نکار و ده‌سه‌ڵاتداره‌وه. که‌یسى (واینشتاین)، گوێ و هێزێکى زۆرى دا به ژنان له سه‌رانسه‌رى جیهان تا بازنه‌ى بێده‌نگى بشکێنن و نادادوه‌رى و هه‌راسانکردن ڕیسوا بکه‌ن.
ژنانى کوردستان ده‌مێکه ئه‌و هه‌نگاوه‌یان ناوه و به شیوه‌یه‌کى کرده‌نى به‌ره‌وڕووى هه‌موو جۆره توندوتیژییه جێنده‌رییه‌کان بوونه‌ته‌وه. دیاره ئه‌و هه‌ڵمه‌ته جیهانییه‌ى ئه‌م دواییه‌ى ژنان، هێزێکى دیکه به ئێمه ده‌به‌خشێ و لێره‌وه داوا له پۆلیس و ده‌سه‌ڵاتى دادوه‌رى ده‌که‌ین گوێ له مه‌ینه‌تى و سکاڵاى ژنان له‌مباره‌یه‌وه بگرن و به دابنیکردنى دادوه‌ری، ئازار و خه‌مى ئه‌و ژنانه که‌م بکه‌نه‌وه و ببنه مۆدێلیکیش بۆ دوورخستنه‌وه‌ى ئه‌و جۆره ڕه‌فتاره ناڕه‌وایانه.
هه‌ر له‌م سۆنگه‌یه‌وه، هاوسۆزى و هاوکاریى خۆمان ده‌رده‌بڕم بۆ که‌سایه‌تى و لایه‌نه پێشکه‌وتنخوازه‌کانى ده‌سه‌ڵاتى فیدراڵ له به‌غدا تا ڕێگا بگرن له پڕۆژه‌ى به‌شوودانى کچ له ته‌مه‌نى (9) ساڵیدا. کچه‌کانمان له‌م ته‌مه‌نه‌دا پێویستییان به خۆشه‌ویستیى دایک و باوکانییان هه‌یه تا بتوانن بره‌و به خوێندن و په‌روه‌رده بده‌ن، نه‌ک ببنه کاڵا و به‌شوو بدرێن و ژیانیان لێ تاڵ بکرێت. ئومێده‌وارم هێزه پێشکه‌وتنخوازه‌کانى عێراق لێنه‌گه‌ڕێین ئه‌م پڕۆژه‌یه بچێته پێشه‌وه و ببێته یاسا له سیسه‌مى فیدراڵى عیراقدا.
له کاتێکدا ئێمه به بڕواوه کار له‌سه‌ر پرسى ژن ده‌که‌ین و ئیراده‌ى سیاسى له‌سه‌ر هه‌موو ئاستێک خراوه‌ته گه‌ڕ، جارێکى دیکه‌ش به پێویستى ده‌زانم ئه‌وه دووپات بکه‌مه‌وه که ئه‌م پرسه فره‌لایه‌ن و فره‌ڕه‌هه‌نده و، داواى کار و هاوکاریى زیاتر له سه‌رجه‌م چین و توێژه‌کانى کۆمه‌ڵگه ده‌که‌م، به ڕێکخراوه ناحکوومییه‌کان و ده‌زگاکانى ڕاگه‌یاندن و مامۆستایانى به‌ڕێزى ئایینى و ڕێکخراوه نێوده‌وڵه‌تیه‌کانه‌وه، بۆ سه‌رخستنى ئه‌و هه‌موو هه‌وڵانه‌ى که له هه‌رێمى کوردستان ده‌درێن.
هه‌ر لێره‌دا دووپاتى ده‌که‌مه‌وه هه‌وڵه‌کانمان بۆ ڕزگارکردنى کچان و ژنانى ئێزدى به‌رده‌وام ده‌بێت. ئه‌وان نموونه‌یه‌کى زیندووى ئه‌و کاره‌سات و نه‌هامه‌تیانه‌ن که له ئه‌نجامى شه‌ێ و توندوتیژیدا، به‌ره‌وڕووى ئافرتان ده‌بنه‌وه. ئێستاش که له په‌رله‌مانى کوردستان یاساى لێبوردنى گشتى تاوتوێ ده‌کرێت، داوا له په‌رله‌مانى کوردستان ده‌که‌م ئه‌و لێبوردنه به هیچ شێوه‌یه‌ک ئه‌نجامده‌رانى تاوان به ناوى شه‌ره‌فپارێزى، نه‌گرێته‌وه.
به‌ڕێزان..
ئه‌م هه‌ڵمه‌ته‌ى ئه‌مساڵ، وه‌کو ساڵانى ڕابردوو دوو هه‌فته ده‌خایه‌نێت و له ده‌ره‌وه‌ى هه‌ڵمه‌ته‌که‌ش ئێمه به هاوکاریى ئێوه‌ى خۆشه‌ویست به شێوه‌یه‌کى سیسته‌ماتیک کار له‌سه‌ر ئه‌م پرسه گرنگه ده‌که‌ین. ئه‌مه بۆ ئێمه به‌شێکى گرنگه له پرۆسه‌ى دیموکراسى له ناوچه‌که و بڕواى ته‌واومان به‌وه هه‌یه که ته‌نیا به په‌ره‌پێدانى پرۆسه‌ى دیموکراسی، ده‌توانین مافى هاووڵاتیان دابین بکه‌ین و کۆمه‌ڵگه به‌ره‌وپێش ببه‌ین.
له کۆتاییدا جارێکى دیکه سوپاستان ده‌که‌م بۆ سازدانى ئه‌م هه‌ڵمه‌ته و سوپاسى ڕێکخه‌رانى ئه‌م کۆبوونه‌وه‌یه‌ش ده‌که‌م که ئه‌مڕۆ لێره ئه‌نجامیان داوه، ده‌ستخۆشى له ئه‌نجومه‌نى باڵاى خانمان ده‌که‌م که هه‌میشه به دڵسۆزییه‌وه کاره‌کانیان ئه‌نجام داوه، هه‌روه‌ها لێره ده‌مه‌وێ سوپاسێکى تایبه‌تیش ئاراسته‌ى وه‌زاره‌تى ناوخۆى حکوومه‌تى هه‌رێمى کوردستان بکه‌م بۆ دروستکردنى ئه‌و به‌شانه‌ى تایبه‌ت به نه‌هێشتنى توندوتیژى دژى ئافره‌تانن و داوایان لێده‌که‌م په‌ره به کاره‌کانیان بده‌ن و جددیتر بن. ئه‌وه‌ى تا ئێستا ئێمه ئه‌نجاممان داوه، ئه‌وه نییه که ئیتر ڕاوه‌ستین، ده‌بێت به‌رده‌وام بین بۆ گه‌یشتن به‌و ئاواتانه‌ى هه‌موومان کار و خه‌باتیان بۆ ده‌که‌ین.
ئێوه‌ش هه‌مووتان به‌خێربێن و زۆر سوپاس.
وتار
-
ڕه‌وشى ڕۆژنامه‌نوسى کوردى یان جیهانی
07.02.2024 -
ره‌گه‌ز گۆڕین کارێکى قێزه‌وه‌ن و شووره‌ییه
29.01.2024 -
سوکایه‌تى و بێڕێزى له‌پاى چی؟
10.01.2024
زۆرترین خوێندراو
- ڕۆژ
- هەفتە
- مانگ
-
پارتی و یه‌كێتی له سه‌ر دوو وه‌زاره‌ت ڕێكنه‌كه‌وتوون
27.10.2022
-
دوورخستنەوەی سەرۆککۆماری پێشووی چین ئاشكرا ده‌كرێت
23.10.2022
-
له كفری پارتی سۆسیال دیموكرات خولێكی تۆپی پێ ده‌كاته‌وه
22.10.2022
-
پارتی سۆسیال دیموكرات گۆڕانكاری ئه‌نجامده‌دات
23.02.2023