سه‌رۆکى حکومه‌ت پرۆژه‌ى بنیاتنانى که‌مپێک له‌ شاریا به‌ سه‌ر ده‌کاته‌وه‌

9/21/2014 10:24:00 PM
وێنەکان
سه‌رۆکى حکومه‌ت پرۆژه‌ى بنیاتنانى که‌مپێک له‌ شاریا به‌ سه‌ر ده‌کاته‌وه‌
جەماوەر نیوز
جه‌ماوه‌رنیوز

ئێواره‌ى ئه‌مڕۆ یه‌کشه‌ممه‌ 21ى ئه‌یلوولى 2014، نێچیرڤان بارزانى سه‌رۆک وه‌زیرانى هه‌رێمى کوردستان، به‌ یاوه‌ریى قوباد تاڵه‌بانى جێگرى سه‌رۆک وه‌زیران و وه‌زیرانى په‌یوه‌ندار به‌ قه‌یرانى ئاواره‌کان و پارێزگارى دهۆک، به‌ ئاماده‌بوونى به‌ڕێز کونسلى گشتیى تورکیا له‌ هه‌رێمى کوردستان، سه‌ردانى پرۆژه‌ى بنیاتنانى که‌مپێکى ئاواره‌کانى له‌ کۆمه‌ڵگه‌ى شاریا کرد، که‌ له‌ لایه‌ن ده‌زگاى ئافاد- ى حکوومیى تورکیاوه‌، به‌ ستاندارتێکى به‌رز، دروست ده‌کرێت.

سه‌رۆک وه‌زیران و وه‌فدى یاوه‌ری، نموونه‌ى چه‌ند خێوه‌تێکى که‌مپه‌که‌یان به‌ سه‌ر کرده‌وه‌، که‌ چوار هه‌زار خێوه‌ت له‌ خۆ ده‌گرێت و‌ هه‌ر خێوه‌تێک بۆ خێزانێکه‌، به‌ شێوه‌یه‌کیش دروست کراون که‌ تیایاندا ڕه‌چاوى بارودۆخى که‌شوهه‌وا و سارد و گه‌رمى کراوه‌. هه‌روه‌ها چه‌ند یه‌که‌یه‌کى جیاجیاى تایبه‌تیان بۆ شوشتن و پاککردنه‌وه‌ و دووش و گه‌رماو و توالێت دروست کردووه‌ و کاره‌بایان گه‌یاندووه‌ته‌ خێوه‌ته‌کان، خێوه‌ته‌کانیش تایبه‌تمه‌ندیى دژى سووتانیان تیادایه‌ و له‌ ده‌ره‌وه‌ش سه‌رما و تیشکى خۆر کاریگه‌رى له‌سه‌ر نیه‌.

دواى به‌سه‌رکردنه‌وه‌ى به‌شه‌کانى که‌مپه‌که‌،  سه‌رۆکى حکومه‌ت به‌ ناوى خۆى و حکوومه‌تى هه‌رێمى کوردستانه‌وه‌، سوپاس و پێزانینى پێشکه‌ش به‌ ده‌زگاى ئافاد و حکوومه‌تى تورکیا کرد و دووپاتى کرده‌وه:‌ تورکیا نه‌ک هه‌ر ئێستا، به‌ڵکوو له‌ ڕابردووشدا که‌ گه‌لى کوردستان تووشى کاره‌سات و نه‌هامه‌تى هاتووه‌، ده‌ستى هاوکارى و یارمه‌تى بۆ درێژ کردووه‌ و به‌هانایه‌وه‌ى چووه‌. هه‌روه‌ها ڕایگه‌یاند وێڕاى ئه‌وه‌ى که‌ ده‌زگاى ئافاد له‌ چه‌ند شوێنێکى دیکه‌ى هه‌رێمى کوردستان، که‌مپى هاوشێوه‌یان هه‌یه‌، چاوه‌ڕێ ده‌که‌ن تورکیا و ده‌زگاى ئافاد بۆ پازده‌ هه‌زار خێزانى دیکه‌ش خێوه‌تى هاوشێوه‌ بنێرن و چه‌ندین که‌مپى دیکه‌، به‌ هه‌مان ستاندارد بنیات بنێن.

له‌ کۆتاییى به‌سه‌رکردنه‌وه‌که‌دا، سه‌رۆک وه‌زیران، وێڕاى پێشکه‌شکردنى سوپاس و پێزانین بۆ سه‌رپه‌رشتیاران و ئه‌نجامده‌رانى کاره‌کانى دروستکردنى که‌مپه‌که‌، دووپاتى کرده‌وه‌ که‌ حکوومه‌تى هه‌رێمى کوردستان هه‌موو هاوکارى و ئاسانکارییه‌ک بۆ ده‌زگاى ئافاد پێشکه‌ش ده‌کات بۆ ئه‌وه‌ى بتوانێت به‌ ئاسانى که‌لوپه‌ل و پێویستییه‌کانى دروستکردنى که‌مپه‌کان؛ بهێنێته‌ کوردستان و بۆ ئه‌م مه‌به‌سته‌ لایه‌نه‌ په‌یوه‌نداره‌کانى ڕاسپارد که‌ هه‌موو ئاسانکارییه‌ک پێشکه‌ش بکه‌ن.



لۆگۆ
سەرپێچی

وتار

زۆرترین خوێندراو