فه‌ره‌نسا هاوکاریى زیاترى هه‌رێمى کوردستان ده‌کات

10/22/2014 6:51:00 PM
وێنەکان
فه‌ره‌نسا هاوکاریى زیاترى هه‌رێمى کوردستان ده‌کات
جەماوەر نیوز
جه‌ماوه‌رنیوز

ئێواره‌ى ئه‌مڕۆ چوارشه‌ممه‌ 22ى تشرینى یه‌که‌مى 2014، نێچیرڤان بارزانى سه‌رۆک وه‌زیرانى هه‌رێمى کوردستان پێشوازى له‌ "مارک باریتى" باڵیۆزى نوێى فه‌ره‌نسا له‌ عیراق و شاندێکى یاوه‌رى کرد.

له‌ دیدارێکدا خۆشحاڵیى خۆى به‌ سه‌ردانى کوردستان نیشان دا و جه‌ختى له‌ په‌ره‌پێدان به‌ په‌یوه‌ندیى دوولایه‌نه‌ى هه‌رێمى کوردستان و فه‌ره‌نسا کرده‌وه‌ که‌ په‌یوه‌ندییه‌کى کۆنه‌ و له‌سه‌ر بنه‌ماى دۆستانه‌ دامه‌زراوه‌، به‌هاناوه‌چوونى حکوومه‌ت و خه‌ڵکى کوردستانیشى بۆ ئاواره‌ و په‌نابه‌ران، به‌ مایه‌ى سوپاس و پێزانین له‌ قه‌ڵه‌م دا و ڕایگه‌یاند فه‌ره‌نسا له‌ هاوکاریکردنى سه‌ربازى و مرۆیى بۆ کوردستان به‌رده‌وام ده‌بێت و هاوکارییه‌ مرۆییه‌کانى زیاتر ده‌کات، له‌و میانه‌شدا چه‌ند ئێن جى ئۆیه‌کى فه‌ره‌نسى بۆ یارمه‌تیدان و پێشکه‌شکردنى خزمه‌تگوزاریى مرۆیى به‌ ئاواره‌ و په‌نابه‌ران، دێنه‌ هه‌رێمى کوردستان.‌ هه‌روه‌ها تیشکى خسته‌ سه‌ر کار و چالاکییه‌کانى سه‌نته‌رى کولتووریى فه‌ره‌نسى له‌ هه‌ولێر.

بارودۆخى ئه‌منى و سه‌ربازى له‌ عیراق و پرۆسه‌ى سیاسیى وڵاته‌که‌، له‌گه‌ڵ گرنگیى به‌شداریکردنى کورد و سوننه‌ له‌ حکوومه‌تى تازه‌ى عیراقدا و دروستکردنى هاوپه‌یمانیى نێوده‌وڵه‌تى بۆ جه‌نگى دژى تیرۆر و باوردۆخى کۆبانێ، لایه‌نێکى دیکه‌ى دیداره‌که‌ ‌بوو. هه‌ردوولاش له‌سه‌ر پێویستیى ‌دۆزینه‌وه‌ى چاره‌سه‌رێک بۆ دۆخى مووسڵ و ڕزگارکردنى له‌ تیرۆرستان هاوڕا بوون، تا ببێته‌ هانده‌رێک و ده‌رفه‌تى گه‌ڕانه‌وه‌ى خه‌ڵکى ئاواره‌ بۆ سه‌ر زێد و شوێنه‌کانى خۆیان بێته‌ ئاراوه‌.‌

لاى خۆیه‌وه‌ نێچیرڤان بارزانى ئاماژه‌ى به‌وه‌ دا که‌ هه‌رێمى کوردستان به‌و په‌ڕى بایه‌خه‌وه‌ له‌ په‌یوه‌ندییه‌کانى له‌گه‌ڵ فه‌ره‌نسا ده‌ڕوانێت و سوپاسى حکوومه‌ت و خه‌ڵکى هه‌رێمى کوردستانى بۆ سه‌ردانى فرانسوا هۆلاند سه‌رکۆمارى فه‌ره‌نسا بۆ هه‌ولێر دووپات کرده‌وه،‌ که‌ وه‌ک پشتگیرییه‌کى سیاسیى مه‌زن بوو بۆ هه‌رێمى کوردستان. خواست و ئاره‌زووى کوردستانیشى بۆ په‌ره‌پێدان و به‌ره‌وپێشبردنى په‌یوه‌ندیى دووقۆڵى له‌ هه‌موو بواره‌کاندا ده‌ربڕى.

له‌ کۆتاییى دیداره‌که‌دا سه‌رۆک وه‌زیران، تیشکى خسته‌ سه‌ر خواستى هه‌رێمى کوردستان بۆ چاره‌سه‌رکردنى هه‌موو کێشه‌کانى هه‌ولێر و به‌غدا و جه‌ختى له‌سه‌ر‌ پشتگیریى هه‌رێمى کوردستان بۆ حکوومه‌تى عه‌بادى کرده‌وه‌، هه‌روه‌ها په‌یوه‌ندییه‌کانى هه‌ولێرى له‌گه‌ڵ تاران و ئه‌نقه‌ره‌ به‌ گرنگ له‌ قه‌ڵه‌م دا.



لۆگۆ
سەرپێچی

وتار

زۆرترین خوێندراو