نێچیرڤان بارزانى: کێشه‌ى سوریا به‌ ڕێگه‌چاره‌ى سیاسى چاره‌سه‌ر ده‌بێت

10/24/2014 1:41:00 PM
وێنەکان
نێچیرڤان بارزانى: کێشه‌ى سوریا به‌ ڕێگه‌چاره‌ى سیاسى چاره‌سه‌ر ده‌بێت
جەماوەر نیوز
جه‌ماوه‌رنیوز

پێشنیوه‌ڕۆى پێنجشه‌ممه‌ 23ى ئۆکتۆبه‌رى 2014، نێچیرڤان بارزانى سه‌رۆک وه‌زیرانى هه‌رێمى کوردستان پێشوازى له‌ ستیڤان دى مستۆرا نێردراوى تایبه‌تى سکرتێرى گشتیى نه‌ته‌وه‌ یه‌کگرتووه‌کان له‌ سووریا و شاندێکى یاوه‌رى کرد.

له‌ دیدارێکدا دى مستۆرا خۆشحاڵیى خۆى به‌ پێشکه‌وتنه‌کانى هه‌رێمى کوردستان نیشان دا و ئاماژه‌ى به‌وه‌ دا له‌ ڕاپه‌ڕینى 1991ه‌وه‌ تا ئێستا، پێشکه‌وتنى گه‌وره‌ و دڵخۆشکه‌ر له‌ هه‌رێمى کوردستان هاتوونه‌ته‌ ئاراوه‌. هه‌روه‌ها سوپاسى حکوومه‌تى هه‌رێمى کوردستانى کرد که‌ پێشوازى له‌ نزیکه‌ى ملیۆنێک و پێنجسه‌د هه‌زار ئاواره‌ و په‌نابه‌ر کردووه‌ و دووپاتى کرده‌وه‌ کۆمه‌ک و هاوکاریى ڕێکخراوه‌کانى نه‌ته‌وه‌ یه‌کگرتووه‌کان و کۆمه‌ڵگه‌ى نێوده‌وڵه‌تى بۆ هه‌رێمى کوردستان به‌رده‌وام ده‌بن.

بارودۆخى عیراق و ناوچه‌که‌ و مه‌ترسیى تیرۆر و پێکهێنانى هاوپه‌یمانیى نێوده‌وڵه‌تى بۆ ڕووبه‌ڕووبوونه‌وه‌ى تیرۆرستان و گرنگیى به‌شداریى هه‌مووان له‌ حکوومه‌تى تازه‌ى عیراقدا لایه‌نێکى دیکه‌ى دیداره‌که‌ بوو، تیایدا  سه‌رۆک وه‌زیران جه‌ختى له‌سه‌ر ئه‌وه‌ کرده‌وه‌ که‌ ڕووبه‌ڕووبوونه‌وه‌ى تیرۆر، سیاسه‌ت و ستراتیژێکى گشتگیرى پێویسته‌ و ده‌بێ له‌ ڕووى سه‌ربازى و مرۆییشه‌وه‌ هاوکاریى زیاترى هه‌رێمى کوردستان بکرێت. ده‌رباره‌ى سووریاش، نێچیرڤان بارزانى دووپاتى کرده‌وه‌ کێشه‌ى سووریا کێشه‌یه‌کى سه‌ربازى نیه‌ و ده‌بێ ڕێگه‌چاره‌یه‌کى سیاسى بۆ چاره‌سه‌رکردنى بدۆزرێته‌وه‌ تا ئارامى له‌ ناوچه‌که‌دا سه‌قامگیر ببێت‌.

سه‌رۆک وه‌زیران هه‌روه‌ها سوپاسى کۆمه‌ک و هاوکارییه‌ مرۆییه‌‌کانى نه‌ته‌وه‌ یه‌کگرتووه‌کان و کۆمه‌ڵگه‌ى نێوده‌وڵه‌تى و هاوکارى بۆ کۆبانێ کرد، ڕوونیشى کرده‌وه‌ که‌ هه‌رێمى کوردستان پێویستى به‌ کۆمه‌ک و هاوکاریى زیاتر هه‌یه‌ و ڕێکخراوه‌ نێوده‌وڵه‌تیه‌کان و وڵاتانى کۆمه‌کبه‌خش، ده‌بێ زیاتر هاوکاریى ئاواره‌ و په‌نابه‌ران له‌ هه‌رێمى کوردستان بکه‌ن.

له‌ کۆتاییى دیداره‌که‌دا دى مستۆرا دووباره‌ خۆشحاڵیى خۆى به‌ سه‌ردانى هه‌رێمى کوردستان ده‌ربڕى و ڕایگه‌یاند که‌ هه‌رێمى کوردستان بوێرانه‌ به‌ره‌نگارى تیرۆر بووه‌ته‌وه‌ و به‌رگرى و به‌رخودانى کردووه‌، بۆیه‌ به‌ دواڕۆژى هه‌رێمى کوردستان گه‌شبینن و ده‌گاته‌ ئامانجى خۆى.


لۆگۆ
سەرپێچی

وتار

زۆرترین خوێندراو