حکومه‌تى هه‌رێم له‌راگه‌یه‌نراویکدا وه‌ڵامى موحسن ڕه‌زایى ده‌داته‌وه‌

7/18/2016 5:56:00 PM
وێنەکان
حکومه‌تى هه‌رێم له‌راگه‌یه‌نراویکدا وه‌ڵامى موحسن ڕه‌زایى ده‌داته‌وه‌
جەماوەر نیوز
جه‌ماوه‌رنیوز







له‌ ڕاگه‌یاندراوێکدا ئه‌نجومه‌نى وه‌زیرانى هه‌رێمى کوردستان وه‌ڵامى چه‌ند لێدوانێکى موحسن ڕه‌زایى ئه‌میندارى ئه‌نجومه‌نى ته‌شخیسى مه‌سڵه‌حه‌تى کۆمارى ئیسلامیى ئێران ده‌داته‌وه‌، ئه‌مه‌ ده‌قه‌که‌یه‌تى:

به‌ڕێز موحسن ڕه‌زایى ئه‌میندارى ئه‌نجومه‌نى ته‌شخیسى مه‌سڵه‌حه‌تى کۆمارى ئیسلامیى ئێران له‌ چاوپێکه‌وتنێکیدا له‌گه‌ڵ ته‌له‌ڤزیۆنى شه‌به‌که‌ى یه‌کى وڵاته‌که‌ى باسى له‌وه‌ کردووه‌ که‌ وڵاتى سعوودیه‌ یارمه‌تیى حزبه‌ ئۆپۆزیسیۆنه‌کانى ئێرانى داوه‌ و له‌ شارى هه‌ولێر دوو حزبى کوردى ڕۆژهه‌ڵاتى چالاک کردووه‌ و بنکه‌یان له‌ نزیک سنووره‌کان ئێران دامه‌زراندووه‌ و ئه‌گه‌ر ئه‌وان هه‌ر به‌رده‌وام بن و حکوومه‌تى هه‌رێم بیرێک له‌م بابه‌ته‌ نه‌کاته‌وه‌، ئه‌وا به‌مزووانه‌ له‌دژیان ئۆپه‌راسیۆنى سه‌ربازى ئه‌نجام ده‌ده‌ین و ئۆباڵه‌که‌یش ده‌خه‌ینه‌ سه‌ر شانى سه‌رۆک بارزانی.


له‌ وه‌ڵامى ئه‌و به‌رپرسه‌ى کۆمارى ئیسلامیى ئێران ڕایده‌گه‌یه‌نین که‌:

یه‌که‌م: سه‌رتاپاى ئه‌و زانیارى و لێکدانه‌وانه‌ى به‌ڕێز موحسنى ڕه‌زایى له‌باره‌ى ڕووداوه‌ سنوورییه‌کانى ئه‌م دواییه‌وه‌ که‌ له‌ چاوپێکه‌وتنه‌که‌دا باسى کردووه‌ هه‌ڵه‌ن و هیچ بنه‌مایه‌کى نییه‌.

دووه‌م: کۆمیته‌یه‌کى هاوبه‌شى ئه‌منى له‌نێوان کۆمارى ئیسلامیى ئێران و هه‌رێمى کوردستاندا هه‌یه‌. هه‌ر گرفت و کێشه‌یه‌ک هه‌بێت له‌و کۆمیته‌یه‌دا باس ده‌کرێ و چاره‌سه‌ر ده‌کرێ. ئه‌گه‌ر یه‌ک به‌ڵگه‌ هه‌بێت له‌سه‌ر ڕاستیى قسه‌کانى به‌ڕێز ڕه‌زایی، با کۆمیته‌ى هاوبه‌شى ئه‌منى به‌دواداچوونى بۆ بکات.

سێیه‌م: به‌لاى هه‌رێمى کوردستانه‌وه‌ ئاساییش و سه‌قامگیریى کۆمارى ئیسلامیى ئێران گرنگه‌ و بایه‌خى هه‌یه‌ و به‌ ئاساییشى ئێران ئاساییشى ناوچه‌که‌یش پارێزراو ده‌بێت. له‌گه‌ڵ ئه‌وه‌یشدا هه‌ر لایه‌نێک ده‌بێ خۆیشى بتوانێ هۆکارى گرفته‌کان بدۆزێته‌وه‌ و کار بۆ چاره‌سه‌رکردنى بکات.

چواره‌م: په‌رۆشین بۆ قووڵکردنه‌وه‌ى په‌یوه‌ندییه‌کان و کارى هاوبه‌ش و دۆستایه‌تیى نێوان کۆمارى ئیسلامیى ئێران و هه‌رێمى کوردستان.

ئه‌نجومه‌نى وه‌زیرانى هه‌رێمى کوردستان.
18-7-2016


لۆگۆ
سەرپێچی

وتار

زۆرترین خوێندراو