نێچیرڤان بارزان و شاندێکى کۆنگرێسى ئه‌مه‌ریکا کۆده‌بنه‌وه‌

2/22/2017 3:53:00 PM
وێنەکان
نێچیرڤان بارزان و شاندێکى کۆنگرێسى ئه‌مه‌ریکا کۆده‌بنه‌وه‌
جەماوەر نیوز
جه‌ماوه‌رنیوز









پێشنیوه‌ڕۆى ئه‌مڕۆ چوارشه‌ممه‌ 22 ى شوباتى 2017 ،نێچیرڤان بارزانى سه‌رۆک وه‌زیرانى هه‌رێمى کوردستان، پێشوزاى له‌ شاندێکى کۆنگرێسى ئه‌مه‌ریکا به‌ سه‌رۆکایه‌تیى جۆ وێڵسن ئه‌ندامى کۆنگرێس و شاندێکى دیپلۆماسى و سه‌ربازیى یاوه‌رى کرد.

له‌ دیدارێکدا که‌ قوباد تاڵه‌بانى جێگرى سه‌رۆک وه‌زیران و ژماره‌یه‌ک له‌ به‌رپرسانى حکوومه‌تى هه‌رێمى کوردستان ئاماده‌ى بوون، وێڵسن خۆشحاڵى به‌ دووه‌م سه‌ردانى خۆى و پێشکه‌وتنه‌کانى هه‌رێمى کوردستان ده‌ربڕى و ڕۆڵى خه‌ڵک و حکوومه‌ت و پێشمه‌رگه‌ى کوردستانى له‌ ڕووبه‌ڕووبوونه‌وه‌ى تیرۆر و پاراستنى هه‌موو پێکهاته‌کان به‌رز نرخاند، هه‌روه‌ها پرسه‌ و سه‌ره‌خۆشى بۆ که‌سوکارى شه‌هیدانى شه‌ڕى دژى تیرۆر ڕاگه‌یاند و هیواى زووچاکبوونه‌وه‌ى بۆ برینداران خواست.

له‌ به‌شێکى دیکه‌ى قسه‌کانیدا هیواى تۆکمه‌کردنى زیاترى په‌یوه‌ندییه‌کانى هه‌رێمى کوردستان و ئه‌مه‌ریکاى خواست و به‌رده‌وامیى هاوکارییه‌کانى وڵاته‌که‌یشى بۆ هه‌رێمى کوردستان دووپات کرده‌وه‌. دواتر شاندى میوان چه‌ند پرسیارێکیان سه‌باره‌ت به‌ چاکسازییه‌کانى حکوومه‌تى هه‌رێمى کوردستان بۆ ڕووبه‌ڕووبوونه‌وه‌ى قه‌یرانى دارایى و کێشه‌ هه‌ڵواسراوه‌کانى نێوان هه‌ولێر و به‌غدا ئاراسته‌ى به‌ سه‌رۆک وه‌زیرانى هه‌رێمى کوردستان کرد.

لاى خۆیه‌وه‌ سه‌رۆک وه‌زیرانى هه‌رێمى کوردستان سوپاسى ئه‌و سه‌ردانه‌ و هاوکارییه‌ به‌رده‌وامه‌کانى ئه‌مه‌ریکاى بۆ هه‌رێمى کوردستان کرد به‌تایبه‌تى له‌ شه‌ڕى دژى تیرۆرستانى داعش و ڕاهێنان و مه‌شقکردن به‌ پێشمه‌رگه‌ و هاوکارییکردنى ئاواره‌ و په‌نابه‌رانى ده‌ستى تیرۆر، دووپاتیشى کرده‌وه‌ که‌ به‌ هۆى قه‌یرانى داراییه‌وه‌ بارگرانییه‌کى زۆر بۆ هه‌رێمى کوردستان دروست بووه‌ و به‌غداش له‌م ڕووه‌وه‌ هاوکار نه‌بووه‌ و‌ هیواى خواست کۆمه‌ڵگه‌ى نێوده‌وڵه‌تى هاوکاریى زیاتر هه‌رێمى کوردستان بکات.

سه‌باره‌ت به‌ په‌یوه‌ندییه‌کانى نێوان هه‌رێم کوردستان و حکوومه‌تى فیدرال، ئاماژه‌ى به‌وه‌دا که‌ له‌ ڕووى سه‌ربازییه‌وه‌ هه‌ماهه‌نگییه‌کى باش له‌ نێوان هه‌ردوولادا هه‌یه‌ و په‌یوه‌ندییه‌کان ئاسایین، به‌ڵام له‌ بواره‌کانى دیکه‌دا به‌تایبه‌تى بۆ چاره‌سه‌رکردنى کێشه‌ هه‌ڵواسراوه‌کان، هیچ پێشکه‌وتنێک دروست نه‌بووه‌. باسیشى له‌ هه‌وڵه‌کانى هه‌رێمى کوردستان کرد بۆ حه‌واندنه‌وه‌ى ئاواره‌کان و ڕازیکردنیان بۆ ئه‌وه‌ى له‌ وڵاتى خۆیاندا بمێننه‌وه‌ تاکو دواى ئازادکردنه‌وه‌ى ده‌ڤه‌ره‌کانیان بگه‌ڕێنه‌وه‌ سه‌ر زێدى خۆیان، بۆ ئه‌م مه‌به‌سته‌ش به‌ پێویستى زانى کۆمه‌ڵگه‌ى نێوده‌وڵه‌تى ڕۆڵى خۆى ببینێت.
 



لۆگۆ
سەرپێچی

وتار

زۆرترین خوێندراو