ئه‌توانى له‌رێگاى ئیمه‌یڵ و ژماره ته‌له‌فۆنه‌کانمانه‌وه په‌یوه‌ندیمان پێوه‌بکه‌یت و راوسه‌رنج وپێشنیارو داواکاریه‌کانى خۆت بخه‌یته‌روو.
07705066052
پێنج لایه‌نى سیاسى پرۆژه‌یه‌کى هاوبه‌ش بۆ چاره‌سه‌رى قه‌یرانى موچه و کێشه‌کانى هه‌رێم ده‌خه‌نه‌روو
2/23/2017 3:03:00 PM
جەماوەر نیوز
جه‌ماوه‌رنیوز
رۆژى 22 ى شوباتى 2017 له پرێس کونفرانسێکدا له شارى هه‌ولێر پێنج لایه‌نى سیاسى کورستان ( حزبى سۆسیالیست دیموکراتى کوردستان ، بزووتنه‌وه‌ى دیموکراتى گه‌لى کوردستان ، حزبى زه‌حمه‌تکێشانى کوردستان ، حزبى شیوعى کوردستان ، پارتى کرێکاران و ڕه‌نجده‌رانى کوردستان ) ناوه‌ڕۆکى چه‌ند پرۆژه‌یه و پێشنیارێکمان بۆ ڕاى گشتى ڕاگه‌یاند له‌وانه : " پرۆژه‌ى چاره‌سه‌رى گرفتى ده‌وڵه‌تى عێراق ، پێکه‌وه ژیانى ئاره‌زوومه‌ندانه به ئیراده‌ى ئازادى گه‌لان و پێکهاته‌کان ".
هه‌روه‌ها پێشنیارى بۆ چاره‌سه‌رى کێشه‌ى ئابوورى و قه‌یرانى موچه و کێشه‌ى کۆمسیۆنى سه‌ربه‌خۆى هه‌ڵبژاردنه‌کان و ڕاپرسى له هه‌رێمى کوردستان و دۆخى سیاسى هه‌رێمى کوردستان .
ئه‌مه‌ى خواره‌وه ده‌قى پرۆژه‌ى پێشنیارکراوه له‌سه‌ر کێشه و گرفت و پرسه‌کانى هه‌رێم له‌گه‌ڵ به‌غدا
پرۆژه‌ى چاره‌سه‌رى گرفتى ده‌وڵه‌تى عیراق
پێکه‌وه‌ژیانى ئاره‌زوومه‌ندانه به ئیراده‌ى ئازادى گه‌لان و پێکهاته‌کان .
پێشه‌کی
ده‌وڵه‌تى عیراق له‌سه‌ره‌تاى دامه‌زراندنیه‌وه کێشه له بونیاده‌که‌یدا هه‌یه‌و ئه‌م گرفته‌ش له‌سیستمه سیاسیه ده‌سه‌ڵاتداره یه‌ک له‌دواى یه‌که‌کانى په‌ره‌ى سه‌ندووه. به‌جۆرێک تائێستا نه‌یتوانیوه سیستمێک دابرێژێت که له‌ناوخۆدا ده‌سته‌به‌رى ئاشتى کۆمه‌ڵایه‌تیو پێکه‌وه‌ژیانى نێوان پێکهاته‌کان بکات‌و له‌ده‌ره‌وه‌ش له‌سه‌ر بنه‌ماى هاوسه‌نگیو هاوتایی سه‌رچاوه‌ى گرتبێت. له ده‌رئانجامى به‌رده‌وامبوونى ئه‌م گرفته له‌لایه‌ک‌و سیاسه‌تى رژێمه ده‌سه‌ڵاتداره‌کان له‌گرتنه‌به‌رى رێبازى فه‌رامۆشکردن‌و ره‌تکردنه‌وه‌ى به‌رامبه‌رو چه‌وساندنه‌وه له لایه‌کى دیکه، هۆى به‌رپابوونى شه‌ڕى ناوخۆو ده‌ره‌کى و له‌ده‌ستدانى هێزى مرۆییو سامانى ئابووریو له‌به‌ینچوونى ئارامیو ژیانى هاوبه‌ش بووه له عێراقدا.
به تێڕوانین له مێژووى ده‌وڵه‌تى عیراق‌و ده‌ستووره‌کانی، ئاشکرایه که هه‌ر له ده‌ستوورى ساڵى ١٩٢٥وه تاکو ٢٠٠٣، له ئه‌نجامى کاریگه‌رى هۆکارى ده‌ره‌کیو لاوازى رۆڵ‌و ئیراده‌ى عیراقیه‌کان له‌دارشتنیان، یان ناته‌بایى و باوه‌ڕنه‌بوون به پێکه‌وه‌ژیانى هاوتاى ئاره‌زوومه‌ندانه نووسراون. ئه‌گه‌ر چاوێک به‌چاره‌سه‌ره پێشنیارکراوه‌کانى تایبه‌ت به بونیادى ده‌وڵه‌ت بخشێنین، بۆمان ده‌رده‌که‌وێت هه‌موویان له ده‌ورى چاره‌سه‌رى لامه‌رکه‌زیو ئۆتۆنۆمیو فیدرالیه‌تدا ده‌سوڕێنه‌وه، که سه‌ره‌ڕاى ئه‌وه‌ى داواى ره‌وان و بگره که‌متریش بوون له شایسته‌ى مێژوویى و یاسایى و واقیعى گه‌لانى، به‌ڵام هێشتا ناوه‌رۆکى کێشه سه‌ره‌کیه‌که نییه، که له‌گرفتى بونیادو مانه‌وه‌ى عیراق وه‌ک ده‌وڵه‌ت به‌رجه‌سته ده‌بێت.
به‌رده‌وامبوونى ئه‌م گرفته‌و ئه‌وه‌ى په‌یوه‌سته به‌ئاسایش‌و پێکه‌وه ژیانى هاوبه‌ش‌و به‌هکه‌ستکردن به کاریگه‌ریه ترسناکه‌کانى له‌سه‌ر دۆخى گه‌لانى عیراق، له‌په‌ره‌سه‌ندنى تایفه‌گه‌رى که ژینگه‌یه‌کى له‌بارى بۆ تیرۆر و شه‌ڕو خوێنڕشتن ره‌خساندووه، هه‌روه‌ها په‌یوه‌ندى گرژى نێوان هه‌رێمى کوردستان‌و حکومه‌تى ناوه‌ندیو سه‌رجه‌م پێکهاته جیاوازه‌کانى عیراق، هۆکارى خستنه‌ڕووى ئه‌م پرۆژه‌یه‌ن، له پێناو دووباره بنیادنه‌نه‌وه‌ى عیراق له‌سه‌ر بنه‌ماى تازه‌ى سه‌رچاوه گرتوو له‌ئیراده‌ى ئازادانه‌ى گهلانو مافه‌کانیان له بڕیاڕدانى چاره‌نووس، ئه‌م پرۆژه‌یه پرانسیپه بنه‌ره‌تیه‌کان، ئامانج‌و میکانیزمى ئه‌م پرسه گرنگ‌و چاره‌نووسسازانه ده‌خاته‌روو به‌شێوه‌ى خواره‌وه.
هۆکاره‌کان:
ئه‌م هێزه کوردستانیانه‌ى که ئه‌م برۆژه‌یه‌یان ئاماده‌کردووه وایده‌بینن که هۆکاره پێویسته‌کانى ئه‌م پرۆژه‌یه بریتین له:
1- فراوانبوونى درزو جیاوازى له‌نێوان گهلانو پێکهاته‌کانى عیراق‌و جێگرتنه‌وه‌ى شوناسى تایفیو ناوچه‌یى له‌جێى شوناسى بنه‌ره‌تیو ره‌نگدانه‌وه‌یان له‌دروستبوونى سیستمى پشکێنه له‌به‌رێوه‌بڕدنى ده‌وڵه‌ت، هه‌روه‌ها نه‌توانینى جێبه‌جێکردنى به‌ندو مادده سه‌ره‌کیه‌کانى ده‌ستوورى ساڵى ٢٠٠٥ى بڕیار لێدراو که تایبه‌تن به‌بونیادو به‌ڕێوه‌بردنى ده‌وڵه‌ت. ئه‌و ماددانه‌ى ده‌ستووریش که‌ئاماژه‌ن بۆ زامنى ده‌سته‌به‌رکردنى ئازادى بیروباوه‌ڕو په‌یڕه‌وکردنى ئایین، له لایه‌نى پراکتیکه‌وه نه‌ک جێبه‌جێ نه‌کران به‌ڵکو کۆچى کریستیان له‌خواروو ناوه‌راستى عیراق‌و جێهێشتنى ناوچه مێژووییه‌کان له‌لایه‌ن سابیئه‌ى مه‌ندائى و هه‌ڵمه‌تى جینۆسایدى دژ به کریستان‌و ئیزدیه‌کانى له شنگال‌و ده‌شتى نه‌ینه‌وا لێکه‌وته‌وه.
2- مادده‌ى چواره‌مى ده‌ستوور که تایبه‌ته به‌به‌کارهێنانى زمانه‌کان له‌ده‌رکردنى رۆژنامه و ده‌ڕبڕین له‌ده‌زگا فه‌رمیه‌کانی وه‌ک ئه‌نجومه‌نى نوێنه‌ران‌‌و وه‌زیران، دادگاکان‌و گۆنگره فه‌رمیه‌کان، به‌ته‌واوى جێبه‌جێ نه‌کراون.
3- ده‌ستوور له‌مادده‌ی(٧) هه‌موو قه‌واره‌و رێبازێکى ره‌گه‌زپه‌رستى یان تیرۆرستى یان پاکتاوى ره‌گه‌زى یان هاندان یان رێگا خۆشکردن‌و بانگه‌شه بۆکردن‌و به‌هانه هێنانه‌وه بۆیان، قه‌ده‌غه کردووه، به‌ڵام له‌واقیع‌و پراکتیکدا ده‌بینین بانگه‌شه بۆ تایفه‌گه‌رى ده‌کرێت‌و له‌ژیانى سیاسیدا کارى پێده‌کرێت، هه‌روه‌ک ده‌ستوور پێکهێنانى میلشیاى چه‌کدارى له‌ده‌ره‌وه‌ى هێزه فه‌رمیه‌کان قه‌ده‌غه کردووه، له‌کاتێکدا میلشیا تایفیه‌کان رۆڵى گه‌وره‌یان له‌ململانێه‌کاندا گیراو به یاساش شه‌رعیه‌تیان پێدرا.
4- مادده‌ی(٦٥) له‌ده‌ستوور جێبه‌جێ نه‌کراوه، که داواى دروستکردنى ( ئه‌نجومه‌نى ئیتحادی) ده‌کات، وه‌ک ئه‌نجومه‌نێک که‌نوێنه‌رانى هه‌رێم‌و پارێزگاکانى ریکنه‌خراو له‌ناو هه‌رێم که زامنى هاوسه‌نگى و پاراستنى رۆحى سیستمى فیدراڵى ده‌کات.
5- مادده‌ی(١٠٦)ى دستوور ئاماژه‌ى بۆ دامه‌زراندنى ده‌سته‌یه‌کى گشتى شاره‌زایانى حکومه‌تى ناوه‌ندیو هه‌رێمه‌کان‌و پارێزگاکان کردووه، که تایبه‌ته به چاودێرکردنى داهاته‌کان‌و دادپه‌روه‌رى له دابه‌شکردنیان، به‌ڵام حکومه‌تى عێراق له‌جیاتى جێبه‌جێکردنى ئه‌و مادده‌یه، سیاسه‌تى بودجه بڕین و برسى کردنى خه‌ڵکى هه‌رێمى کوردستانى په‌یڕه‌و کرد.
6- مادده‌ی(١٤٠)ى ده‌ستوور که‌په‌یوه‌سته به‌بابه‌تێکى گرنگ‌و هه‌ستیار، که تایبه‌ته به‌ناوچه کێشه له‌سه‌ره‌کانى نێوان هه‌رێمى کوردستان‌و حکومه‌تى ناوه‌ندی، که به‌ئاسایى کردنه‌وه‌و سه‌رژمێرى ده‌ستپێده‌کات‌و به راپرسى له که‌رکوک‌و ناوچه کێشه له‌سه‌ره‌کانى دیکه کۆتایى دێت، بۆئه‌وه‌ى هاوڵاتیان له‌و شوێنانه به ئیراده‌ى ئازادانه بڕیار له‌سه‌ر ئاینده‌ى خۆیان بده‌ن، به‌ڵام دواى تێپه‌ڕینى (١٤) ساڵ، ده‌سه‌ڵاتدارانى عیراق به جۆره‌ها شێوه کۆسپ‌و ته‌گه‌ره‌یان خستۆته به‌رده‌م جێبه‌جێکردنى ئه‌و مادده‌یه‌و خۆیان لێدزیوه‌ته‌وه.
7- سه‌ربارى ئه‌وه‌ى ده‌ستوور دانى به‌هێزى پێشمه‌رگه‌دا ناوه وه‌ک به‌شێک له سیستمى به‌رگریو سه‌ربازى عیراق، که‌چى له ساڵى (٢٠٠٥)ه‌وه حکومه‌تى عێراق شایسته‌کانى هێزى پێشمه‌رگه‌ى له بوودجه‌و چه‌ک‌و تفاق‌و که‌رسته‌ى سه‌ربازیو مه‌شق‌و راهێنان بێ به‌ش کردووه،که پێچه‌وانه‌ى ده‌ستووره.
8- ئه‌نجومه‌نى نوێنه‌ران تائێستا به‌پێى بنه‌ما ده‌ستووریه‌کان یاساى نه‌وت‌و گازى ده‌رنه‌کردووه‌و به ئامانجى سیاسى پشت گوێى خستووه.
سه‌رجه‌م ئه‌و ماددانه‌ى ئاماژه‌مان پێدا، له‌گه‌ڵ هه‌ندێک مادده‌و پرسى دیکه که ١٢ ساڵه واته دواى ئه‌وه‌ى له‌لایه‌ن خه‌ڵکى عیراق ده‌نگى بۆ دراو بوون به‌بنه‌ماى ده‌ستوور، که‌چى جێبه‌جێنه‌کراون، که ئاماژه‌ى ئاشکران بۆ ئه‌و راستیه‌ى که هیچ ئیراده‌یه‌کى سیاسى له پابه‌ند بوون به‌م ده‌ستوور له ئارادا نییه. ده‌ستوورى عیراق ئه‌وه‌ى چه‌سپاندووه که(پابه‌ندبوون به‌و ده‌ستووره یه‌کێتى ئازادانه‌ى گه‌ل‌و خاک‌و سه‌روه‌رى عیراق ده‌پارێزێت)، به‌ڵام ئه‌زموونى ١٤ ساڵى رابردوو ده‌ریخستووه، که له‌سایه‌ى ئه‌و پرۆسه سیاسیه‌ى ئێستاو ئه‌و سیستمه حوکمڕانیه‌و به‌م بونیاده‌ى ئێستاى ده‌وڵه‌ت، مه‌حاله بتوانرێت ئه‌م یه‌کێتییه بپارێزرێت و درێژه‌ى پێ بدرێت.
هێزه سیاسیه کوردستانیه‌کان له‌گه‌ڵ جه‌خت کردنه‌وه له پابه‌ندنه‌بوونى ده‌سه‌ڵاته‌کانى ناوه‌ندى و هێزه‌کانى ناو حکومه‌تى ناوه‌ندى به‌ده‌ستوور، داوا ده‌که‌ن هێزه سیاسیه کاریگه‌ره‌کان پێداچوونه‌وه‌یه‌کى ره‌خنه‌گرانه‌و جدى بۆ پرۆسه‌ى سیاسى له‌عیراق بکه‌ن‌و پرۆژه‌یان بۆ چاره‌سه‌رى گرفتى ده‌وڵه‌تى عیراق‌و زامنى پێکه‌وه ژیان به‌سه‌رچاوه گرتن له ئیراده‌ى ئازادانه‌ى گهلانو پێکهاته‌کانى عیراق هه‌بێت.
ئامانجى سه‌ره‌کى ئه‌م پرۆژه‌یه:
1- دۆزینه‌وه‌ى زه‌مینه‌یه‌کى واقعى بۆ پێکه‌وه ژیانى هاوبه‌ش له‌نێوان گهلانو پێکهاته‌کانى عیراق به‌پشتبه‌ستن به‌پاراستنى ئاشتى کۆمه‌ڵایه‌تیو چاره‌سه‌رى گرفتى په‌یوه‌ست به موڵکداریو دیاریکردنى سنوورى مێژوویى هه‌رێم‌و پارێزگاکان.
2- ئاراسته‌یه‌کى جدى بۆ به‌گژاچوونه‌وه‌ى تایه‌فه‌گه‌رى و تیرۆرو توندڕه‌وى به‌هه‌موو شیوازه‌کانیه‌وه، هه‌روه‌ها هاوکارى کردن له‌لایه‌نى ئاسایش‌و سه‌ربازیو سیاسى بۆ زالبوون به‌سه‌ر تیرۆردا.
3- چاره‌سه‌رى کێشه ئابوورییه‌کانى عێراق و رێکخستنى سامان و کۆتاییهێنان به ناعه‌داله‌تى و برسى کردنى خه‌ڵکى هه‌رێمى کوردستان.
4- دامه‌زراندنى په‌یوه‌ندى نێوده‌وڵه‌تى ته‌ندروست له‌گه‌ڵ وڵاتانى دراوسێ و کۆمه‌ڵگاى نێوده‌وڵه‌تى به شێوه‌یه‌ک که زامنى ده‌ستوه‌رنه‌دان له‌کاروبارى ناوخۆو هه‌ژموونى ده‌ره‌کى له سیاسه‌تى ناوخۆ بکات.
5- چاره‌سه‌رى گرفتى ده‌وڵه‌تبوونى عیراق، له‌سه‌ر بنه‌ماى ده‌سته‌به‌رى مافى بڕیاردانى چاره‌نووس بۆ گه‌لى کوردستان له ڕێى ئه‌نجامدانى ریفراندۆم بۆ ئه‌و مه‌به‌سته و رێزگردن له ئه‌نجامه‌کانى.
6- گفتوگۆ له‌نێوان سه‌رجه‌م لایه‌ن‌و پێکهاته‌کان دواى جێبه‌جێکردنى مافى بڕیاردانى چاره‌نووس بۆ رێکخستنه‌وه‌ى په‌یوه‌ندى له‌نێوان لایه‌نه تازه‌کان، به‌پێى ئیراده‌ى ئازادانه‌ى ئه‌و لایه‌نانه.
پرانسیپه بنه‌ره‌تیه‌کانى ئه‌م پرۆژه‌یه:
1- ره‌تکردنه‌وه‌ى توندوتیژی له‌چاره‌سه‌رى کێشه‌کان، هه‌روه‌ها په‌نا نه‌بردن بۆ دامه‌زراوه‌و هه‌ستى ئایینى یان نه‌ته‌وه‌ییه توندڕه‌وه‌کان بۆ وروژاندنى جه‌ماوه‌ر له‌کاتى تاوتویى کێشه‌کانى په‌یوه‌ست به جیاوازییه سیاسیه‌کان له نێوان لایه‌نه‌کان.
2- دووپاتکردنه‌وه‌ى فه‌رامۆش نه‌کردنى هیچ نه‌ته‌وه یان پێکهاته‌یه‌ک له گفتوگۆکانى تایبه‌ت به‌داهاتووى ده‌وڵه‌تى عیراق که ده‌سته‌به‌رى پرانسیپه‌کانى پێکه‌وه ژیان‌و ئاشتى کۆمه‌ڵایه‌تى هه‌میشه‌یى بکات.
3- پشت به‌ستن به‌پرانسیپه‌کانى دیموکراسیو مافى مرۆڤ‌و مافى گه‌لان له‌بڕیاردانى چاره‌نووس به‌پێى په‌یماننامه‌ى نه‌ته‌وه یه‌کگرتووه‌کان‌و پیداگرى له‌سه‌ر بنه‌ما نێوده‌وڵه‌تیه‌کان بۆ به‌رێوه‌چوونى رێوشوێنه‌کانى تایبه‌ت به به‌دیهێنانى ئه‌و مافانه.
4- پاراستنى ئازادییه گشتیه‌کان‌و له‌به‌رچاوگرتنى رۆڵى گرنگى رێکخراوه‌کانى کۆمه‌ڵگاى مه‌ده‌نی وه‌ک هۆکارێک بۆ سه‌رکه‌وتنى گفتوگۆکان، له‌گه‌ڵ زامنى به‌شدارى ژنان له‌و گفتوگۆیانه.
میکانیزمى جێبه‌جێکردنى ئه‌م پرۆژه‌یه:
1- پێکهێنانى ئه‌نجومه‌نى باڵاى وتووێژ، که هه‌موو لایه‌نه سیاسیه‌کانى عیراق بگرێته خۆیو هێزه سیاسیه‌کانى هه‌رێمى کوردستانیش به‌وه‌فدێکى هاوبه‌ش به‌شدارى ئه‌و ئه‌نجومه‌نه بکه‌ن.
2- ئه‌و ئه‌نجومه‌نه بڕیاره‌کانى به‌سازان ده‌رده‌کات، هه‌روه‌ها خشته‌یه‌کى کاتى بۆ ته‌واوکردنى دۆسیه‌کان داده‌نێت، به‌شێوه‌یه‌ک جێبه‌جێکردنیان ئه‌رکه بنه‌ره‌تیه‌که ئاسان بکات.
3- بانگهێشتى ئه‌و لایه‌نانه‌ى ده‌ڕبڕى مافى پێکهاته‌و نه‌ته‌وه‌کانن بۆ پێکهێنانى وه‌فدى هاوبه‌ش که ده‌ڕبڕى مه‌یل‌و داخوازى ئه‌و پێکهاتانه‌ن بۆ به‌شدارى کردن له‌و ئه‌نجومه‌نه.
4- ده‌سته‌یه‌کى جێبه‌جێکار له‌لایه‌ن ئه‌نجومه‌نى باڵاى گفتوگۆوه داده‌مه‌زرێ بۆ به‌دواداچوون.
5- ئه‌نجومه‌نى باڵاى گفتوگۆ لیژنه‌ى تایبه‌تمه‌ند بۆ لێکۆڵینه‌وه له‌کێشه ئاڵۆزو سه‌خته‌کان داده‌مه‌زرێنێ، سوود له‌شاره‌زایانى نێوده‌وڵه‌تیش بۆکار ئاسانى ئه‌و لیژنانه وه‌رده‌گیرێت.
6- داوا له‌سکرتێرى گشتى نه‌ته‌وه یه‌کگرتووه‌کان ده‌کرێ نۆێنه‌رێکى تایبه‌تى خۆى دیارى بکات بۆ به‌دواداچون له گرفت‌و ئاینده‌ى ده‌وڵه‌تى عیراق، بۆ به‌شدارى کردن له ئه‌نجومه‌نى گفتوگۆ.
کۆتایی:
ئه‌و هێزو لایه‌نانه‌ى ئه‌م پرۆژه‌یان ئاماده کردووه، بۆ راوێژى هاوبه‌ش بانگى سه‌رجه‌م هێزو لایه‌نه کوردستانیه‌کان ده‌که‌ن بۆ گه‌یشتن به‌پرۆژه‌یه‌کى کوردستانى سه‌راپاگیر، که وێناى بیروراى هه‌موو حزب‌و هێزه کوردستانیه‌کان بێت‌و له‌لایه‌ن وه‌فدى هاوبه‌شى کوردستانى بۆ گفتوگۆ له‌سه‌ر گرفتى ده‌وڵه‌تى عیراق‌و رێگا چاره‌سه‌ره‌کانى وه‌ک بنه‌ما پشتى پێ ببه‌سترێ.
هێز و لایه‌نه‌کانى واژۆیان کردووه :
حزبى شیوعى کوردستان
حزبى زه‌حمه‌تکێشانى کوردستان
پارتى کرێکاران‌و ره‌نجده‌رانى کوردستان
بزووتنه‌وه‌ى دیموکراتى گه‌لى کوردستان
حزبى سۆسیالیست دیموکراتى کوردستان
٢٢ى شوباتى ٢٠١٧
وتار
-
ڕه‌وشى ڕۆژنامه‌نوسى کوردى یان جیهانی
07.02.2024 -
ره‌گه‌ز گۆڕین کارێکى قێزه‌وه‌ن و شووره‌ییه
29.01.2024 -
سوکایه‌تى و بێڕێزى له‌پاى چی؟
10.01.2024
زۆرترین خوێندراو
- ڕۆژ
- هەفتە
- مانگ
-
پارتی و یه‌كێتی له سه‌ر دوو وه‌زاره‌ت ڕێكنه‌كه‌وتوون
27.10.2022
-
دوورخستنەوەی سەرۆککۆماری پێشووی چین ئاشكرا ده‌كرێت
23.10.2022
-
له كفری پارتی سۆسیال دیموكرات خولێكی تۆپی پێ ده‌كاته‌وه
22.10.2022
-
پارتی سۆسیال دیموكرات گۆڕانكاری ئه‌نجامده‌دات
23.02.2023