جەماوەر نیوز
دوای هێرشەکەی چوارشەممەی ڕابردوو بۆ سەر کێڵگەی کۆرمۆر، بۆ یەکەمجار هەناردەکردنەوەی غازی شل لەو کێڵگەوە دەستی پێکردەوە.

 شەوی چوارشەممەی هەفتەی ڕابردوو، کاتژمێر 11:30ـی شەو، بە مووشەک هێرشکرایە سەر کێڵگەی گازی کۆرمۆر لە چەمچەماڵ، بەهۆیەوە زیانی زۆر بەر کێڵگەکە کەوت و بەرهەمهێنانی غاز و هەنارەدەکردنی لە کێڵگە وەستا هاوکات بەرهەمهێنانی کارەبای نیشتمانی دابەزی و پێدانی کاتژمێرەکانی کارەبا لە ڕۆژێکدا کەمبووەوە بۆ پێنج کاتژمێر.

کاتژمێر 11:30 خولەکی بەیانی ئەمڕۆ، 29-11-2025، هەناردەکردنەوەی غازی شل لە کێڵگەی کۆرمۆرەوە بە تانکەر بۆ شارەکانی هەرێمی کوردستان دەستی پێکردەوە.

وەک تاقیکردنەوە یەکەم کاروانی هەناردەکردنەوەی غازی شل، هەشت تانکەری غازی شل لە کێڵگەی کۆرمۆرەوە ڕەوانەی شارەکانی هەرێمی کوردستان کران.

 غازی شل (LPG) ئەو غازەیە بۆ غازی ماڵان و ئۆتۆمبێک و کارگەکان بەکاردێت.

 هەناردەکردنەوەی غازی شل لە لە کێڵگەی کۆرمۆرەوە، وادەکات بڕی غازی شل لە شارەکانی هەرێمی کوردستان کەم نەبێتەوە و نرخەکەشی گران نەبێت.