جەماوەر نیوز
بەرپرسانی بایرن دڵنیان لە مانەوەی هاری کەین لە یانەکەیان و دەیانەوێت گرێبەستەکەشی نوێبکەنەوە.
لە چەند هەفتەی رابردوودا، رۆژنامەکان باسیان لەوە دەکرد کە یانەی بەرشەلۆنەی ئیسپانی بە نیازە لە هاوینی ساڵی داهاتوودا هاری کەینی هێرشبەری ئینگلیزی بگوازێتەوە تا بیکاتە شوێنگرەوەی رۆبێرت لیڤاندۆڤسکی.
رۆژنامەی بێڵد رایگەیاند، بەرپرسانی یانەی بایرن میونشن بە هیچ شێوەیەک ترسیان لەسەر داهاتووی هاری کەین لەگەڵ یانەکەیان نییە و گرنگی بە پڕوپاگەندەی رۆژنامەکان نادەن.
بێڵد نوسیویەتی، یانە ئەڵمانیەکە دڵنیان لەوەی کە ئەستێرە ئینگلیزیەکە تا کاتی کۆتاییهاتنی گرێبەستەکەی کە هاوینی 2027ە لە یانەکەیان دەمێنێتەوە و هەست بە دڵخۆشی دەکات.
دوپاتیکردووەتەوە، پلانی کارگێڕی بایرن میونشن ئەوەیە لە چەند مانگی داهاتوودا ئۆفەرێکی نوێ پێشکەشی هاری کەین بکەن لەپێناو نوێکردنەوەی گرێبەستەکەی لەگەڵ یانەکەیان تا هاوینی 2029.
هاری کەین تا ئێستا 113 یاریی بە درێسی بایرن میونشنەوە ئەنجامداوە و 108 گۆڵ و 29 ئەسیستی هەیە، لەم وەرزەشدا بە تۆمارکردنی 13 گۆڵ لە پێشەنگی گۆڵکارانی خولی ئەڵمانیدایە.