جەماوەر نیوز
کۆمپانیای “Malwarebytes”ی ئەمریکی، کە پسپۆڕە لە بواری ئاسایشی سایبەردا، ڕایگەیاند کە گروپێکی هاککەری نەناسراو توانیویانە زانیاریی زیاتر لە ١٧ ملیۆن هەژمار (ئەکاونت) لە تۆڕی کۆمەڵایەتی “ئینستاگرام” بدزن.
زانیارییە دزراوەکان کامانەن؟
کۆمپانیاکە لە ڕاگەیێندراوێکدا کە لە سەکۆی (X) بڵاویکردووەتەوە، ئاماژەی بەوە کردووە: “تاوانبارانی سایبەر توانیویانە زانیاریی هەستیاری ١٧.٥ ملیۆن هەژماری ئینستاگرام بدزن، کە بریتین لە:
ناوی بەکارهێنەر (Username).
ناونیشانی شوێنی نیشتەجێبوون.
ژمارەی تەلەفۆن.
ناونیشانی ئیمەیڵ و چەندین زانیاری تری تایبەت.”
مەترسییەکان چین؟
لە لایەکی ترەوە، پێگەی “Notebookcheck”ی جیهانی بڵاویکردەوە، کە ئەگەری هەیە هاککەرەکان ئەم زانیارییە دزراوانە بۆ هێرشی “فیشینگ” (Phishing – ڕاوکردنی ئەلیکترۆنی) و دزینی تەواوەتی هەژمارەکان بەکاربهێنن. بەپێی زانیارییەکانی ئەم پێگەیە، ئەو درزە ئەمنییەی بووەتە هۆی ئەم دزینە گەورەیە، لە ساڵی ٢٠٢٤دا ڕوویداوە.