جەماوەر نیوز

مەسرور بارزانی ڕایدەگەیەنێت، حكومەتی هەرێمی كوردستان هیچ بیانوویەکی بۆ حكومەتی فیدڕاڵ نەهێشتووەتەوە و، لە ماوەیەكی نزیكدا دەگەینە ئەنجامێكی ئەرێنی.

 لەمیانی كردنەوەی پرۆژەی جووتسایدی شێخان - لالش، سەرۆكوەزیران مەسرور بارزانی وتارێكی پێشكەش كرد و لە بەشێكی وتارەكەیدا، تیشكی خستە سەر نوێترین پێشهاتەكان لەبارەی پرسی مووچە و بوودجە و هەناردەكردنەوەی نەوتی هەرێمی كوردستان.

 ڕۆژی سێشەممە، ئەنجوومەنی وەزیرانی عێراق لێتێگەیشتنی سێقۆڵی: هەولێر- کۆمپانیاکانی نەوت- بەغدا  بەزۆرینەی دەنگ تایبەت بە هەناردەکردنەوەی نەوتی کوردستان پەسەند کرد.

 مەسرور بارزانی ڕایگەیاند، گفتوگۆكانمان لەگەڵ حكومەتی فیدڕاڵ لەسەر بودجە و مووچە بەردەوامە و ئەو ڕێككەوتنە سێقۆڵیەی كە بڕیارە لەسەر هەناردەكردنەوەی نەوتی هەرێمی كوردستان بكرێت، دەبێتە هەنگاوێكی گرنگ و باش بۆ چارەسەركردنی كێشەكانی دیكە.

لەبارەی ڕێککەوتنی هەولێر و بەغدا سەرۆکوەزیران مەسرور بارزانی وتی، "لە ماوەیەكی نزیكدا لەگەڵ دەگەینە ئەنجامێكی ئەرێنی".

 لە بەشێکی دیکەی قسەکانیدا سەرۆکوەزیران جەختی کردەوە کە هەرێمی کوردستان هەموو پابەندییەکانی خۆی جێبەجێ کردووە و  "هیچ بیانووێكی بۆ حكومەتی فیدڕاڵ نەهێشتووەتەوە."  سەرۆکوەزیران بە پێویستی زانی "عێراق پابەندییەكانی بەرامبەر خەڵكی كوردستان جێبەجێ بكات."