پارێزگاری هەولێر : لە شاری هەولێر هیچ شوێنێكی فەرمی تایبەت بە لەشفرۆشی یاخود قومارخانە نیە

18.08.2025
جەماوەر نیوز
پارێزگاری هەولێر ڕەتی دەكاتەوە لە شاری هەولێر هیچ شوێنێكی فەرمی تایبەت بە لەشفرۆشی یاخود قومارخانە هەبێت، بەڵام خەڵكی لادەر و سەرپێچیكار هەن كە كاری بەدڕەوشتی دەكەن.

 دوای بڵاوبوونەوەی لێدوانی پارێزەرێك بەوەی كە لە شاری هەولێر بەفەرمی شوێنی لەشفرۆشی و باندی بازرگانیكردن بە لەشفرۆشییەوە هەن، دەنگدانەوەی زۆری بەدوای خۆیدا هێنا، هەرزوو دەزگای داواكاری گشتیی دۆسیەی لەسەر ئەم بابەتە جووڵاند و داوای بەدواداچوون بۆ ڕاستی و دروستی قسەكانی ئەو پارێزەرە دەكات، بە پێویستی دەزانێت ڕێكاری یاسایی بگیرێتە بەر.

 ئومێد خۆشناو، پارێزگاری هەولێر لە كۆنفرانسێكی ڕۆژنامەوانیدا ڕایگەیاند، هەموو ئەو تۆمەتە ناڕەوایانەی دەكرێتە سەر هەولێر، گوایە قومارخانە و شوێنی لەشفرۆشیی فەرمی هەبێت، دوورە لە ڕاستی، هاوكات ڕەتی كردەوە گروپ و باندی بازرگانیی لەشفرۆشی لە شارەكەدا هەبن، بەڵكو خەڵكی لادەر لێرە و لەوێ سەرقاڵی كاری بەدڕەوشتین و ئەوەش لە هەموو شوێنێكی جیهان ئەگەری ڕوودانی هەیە.

دووپاتیشی كردەوە مەفرەزەكانی پۆلیس و ئاسایش بەهەماهەنگی لەگەڵ تیمەكانی قایمقامیەت و دەستەی گەشتوگوزار، بە بەردەوام پشكنین و بەدواداچوون بۆ یانە شەوانییەكان و كافتریا و هۆتێل و شوێنە جۆراوجۆرەكان دەكەن بۆ ڕێگریكردن لە كاری لەشفرۆشی، قوماركردن یاخود هەر دیاردەیەكی دیكەی نامۆ كە لەگەڵ داب و نەریتی شاری هەولێر و خەڵكی كوردستان یەكناگرێتەوە. 

بابەتی هاوشێوە

زۆرترین خوێندراو

  • ڕۆژ
  • هەفتە
  • مانگ