سەرۆکی حکومەتی هەرێمی کوردستان راگەیەندراوێکی لەسەر هەناردەکردنەوەی نەوت بڵاوکردەوە و رایگەیاند، ڕێککەوتنی ئەمڕۆی نێوان هەرێمی کوردستان و کۆمپانیاکانی بەرهەمهێنەری نەوت لەگەڵ وەزارەتی نەوتی عێراقی فیدرال و کۆمپانیای سۆمۆ، دەستکەوتی ماندووبوون و هەوڵی زوری تیم و شاندەکانی هەموو لایەک بووە.  بەم هەنگاوە کێڵگەکانی هەرێمی کوردستان دووبارە بە بازاڕی جیهانیی نەوت بەسترانەوە.

ئەمەش لە کاتێکدایە ئەمڕۆ محەممەد شیاع سوودانی، سەرۆک وەزیرانی عێراق رایگەیاند: ئەمڕۆ گەیشتینە ڕێککەوتنێکی مێژوویی.

ئاماژەی بەوەشکرد، کە تێیدا وەزارەتی نەوتی فیدراڵ نەوتی خاوی بەرهەم هێنراو لەو کێڵگانەى کە دەکەوێتە هەرێمی کوردستان وەردەگرێت و لە ڕێگەی بۆری عێراق- تورکیاوە  هەناردەی دەرەوەی دەکات.

جەختیشیکردەوە، هەناردەکردنەوەی نەوت، دابەشکردنی سامان بەشێوەیەکی دادپەروەرانە دەستەبەردەکات و سەرچاوەکانی هەناردەکردن هەمەچەشن دەکات و ئەو ڕێککەوتنە هاندەری وەبەرهێنان دەبێت.