دوو جۆر ماست له‌پشکنینى ته‌ندروستى سلێمانى ده‌رنه‌چوو

07.07.2019

وێنەکان

دوو جۆر ماست له‌پشکنینى ته‌ندروستى سلێمانى ده‌رنه‌چوو

جەماوەر نیوز

به‌پێى پشکنینى به‌ڕێوبه‌رایه‌تى ته‌ندروستى سلێمانى دوو جۆر ماستى کۆمپانیاى کاله‌ شیاوى خواردن نییه‌ و له‌ پشکنین ده‌رنه‌چووه‌.

به‌پێى راپۆرتى لیژنه‌ى دووى سه‌ر به‌ لیژنه‌ هاوبه‌شه‌کانى قائیمقامیه‌تى سلێمانى دواى ئه‌وه‌ى جۆره‌کانى ماستى کۆمپانیاى کاله‌ براوه‌ بۆ بشکنین بۆ دڵنیابوون له‌ لایه‌نى ته‌ندروستى و ده‌رکه‌وتووه‌ هه‌ردوو جۆرى (ماستى به‌یانیان 700گم و سڤن 2 کگم) ته‌ندروست نین بۆ خواردن، سه‌ره‌ڕاى ئه‌وه‌ى که‌ ماوه‌ى به‌کارهێنانیان به‌سه‌رنه‌چووه‌.

به‌پێى راپۆرته‌که‌ ده‌ست به‌سه‌ر‌ (540) دانه‌ له‌ ماستى به‌یانیان و (240) ماستى سڤنى کۆمپانیاکه‌دا گیراوه‌ و دواى پشکنین له‌ناو براوه‌ که‌ به‌رواره‌که‌ى له‌ 2019.6.28 ده‌ست پێده‌کات و به‌ 2019.7.27 کۆتایى پێدێت.

به‌پێى راپۆرتى به‌ڕێوبه‌رایه‌تى ته‌ندروستى سلێمانیش له‌کۆى (8) جۆرى ماستى کۆمپانیاى کاله‌ که‌ پشکنینیان بۆ کراوه‌ ته‌نها هه‌ردوو جۆرى (به‌یانیان و سڤن) له‌ پشکنین ده‌رنه‌چوون و جۆره‌کانى تر به‌پێى پشکنینه‌کان هیچ کێشه‌یه‌کیان نییه‌ و بۆ خواردن گونجاون.

سه‌ره‌ڕاى له‌ناوبردنى ئه‌و بڕه‌ ماسته‌ نه‌شیاوه‌ش کۆمپانیاکه‌ به‌ بڕێک پاره‌ سزا دراوه‌.