هۆشیار زێباری هاته‌ ده‌نگ له‌سه‌ر ڕاگرتنی كاندیدبونی بۆ سه‌رۆك كۆمار

06.02.2022
جەماوەر نیوز

ئەمڕۆ یەکشەممە، دادگەی فیدراڵیی عێراق رایگەیاند، بەشێوەیەکی کاتی رێوشوێنەکانی بەربژێرکردنی هۆشیار زێباری بۆ پۆستی سەرۆک کۆماری عێراق رادەگیرێت، هۆشیار زێباریش دەڵێت، رێز لە بڕیارەکە دەگرێت. 
هۆشیار زێباری لە راگەیێندراوێکدا نووسیویەتی "رێز لە بڕیاری دادگەی فیدراڵی دەگرین لە وەستاندنی بەربژێربوونمان بەشێوەی کاتی تاوەکو یەکلابوونەوەی ئەو داوایەی لەسەرمان تۆمارکراوە."

رۆژی 31ی کانوونی دووەمی 2022 سەرۆکایەتیی ئەنجوومەنی نوێنەرانی عێراق رایگەیاند 25 کەس لەوانەی خۆیان بۆ پۆستی سەرۆک کۆماری عێراق بەربژێر کردبوو، هەموو رێوشوێنەکانی بەربژێرکردنیان یەکلایی بووەتەوە.
وا بڕیارە سبه‌ی 7ی شوباتی 2022 سەرۆک کۆماری عێراق بە دەنگی ئەندامانی ئەنجوومەنی نوێنەرانی عێراق هەڵبژێردرێت.