ژمارەیەك رۆژنامەنووسی شاری سلێمانی بۆ بەشداریكردن لە خولێكی رۆژنامەوانی تایبەت بە چۆنێتیی دروستكردنی هەواڵ و شێوازی داڕشتنی راپۆرت، لە شاری ئەسفەهانی کۆماری ئیسلامی ئێرانن خولەكە لە چوارچێوەی چالاكییەكی هاوبەشی لقی سلێمانیی سەندیكای رۆژنامەنووسانی كوردستان و رۆژنامەی جام كورد بە هاوكاریی رێكخراوی گەشەپێدانی مەدەنیەت CDO بۆ 17 رۆژنامەنووسی شاری سلێمانی رێكخراوە. خولەكە بە دوو قۆناغ بەڕێوەچوو لەهەردوو شاری سلێمانی و ئەسفەهان .

كاروان ئەنوەر، سكرتێری لقی سلێمانی سەندیكای رۆژنامەنووسانی كوردستان لەوبارەیەوەبە جەماوەرنیوزی رایگەیاند: خولەكە دوو قۆناغە، قۆناغی یەكەم لە كۆتایی ساڵی رابردوودا لە شاری سلێمانی بەو رۆژنامەنووسانە وتراوەتەوە و ئێستا رۆژنامەنووسانی فێرخواز لە شاری ئەسفەهانن بۆ تەواوكردنی قۆناغی دووەمی راهێنانەكە و بەگشتی 100 كاتژمێری وانە بە رۆژنامەنووسەكان دەوترێتەوە‌. وتیشی: وانەكانی هەردوو قۆناغەكە لەلایەن مامۆستایان شەهریاری گەنجی، سەید عەلی محەمەد رەزەویی و حەسەنی رەزایی-ەوە پێشكەش دەكرێن، كە سێ ئەكادیمستی شارەزا و راهێنەری نێودەوڵەتین.

ئاماژەی بەوەشدا: لە هەردوو قۆناغی خولەكەدا وانەی تیۆری و پراكتیكی و چەندین بابەتی گرنگ پێشكەشدەكرێن، لەوانە زانیارییە میدیاییەكان و كاریگەرییەكانی میدیا و سۆشیال میدیا لەسەر دانیشتوانی جیهان و كۆمەڵگە بە گشتی ، هەروەها جیاوازییەكانی هەواڵ و داڕشتنەوەی راپۆرت لە میدیاكانی خۆرئاوا و خۆرهەڵاتدا لەگەڵ چەندین زانیاری تری میدیایی. قۆناغی دووەمی خولەكە لە شاری ئەسفەهان ماوەی حەوت رۆژ دەخایەنێت و رۆژانە بۆ ماوەی هەشت كاتژمێر لەلایەن سێ ئەكادیمستی شارەزا و راهێنەری نێودەوڵەتییەوە، وانە بە رۆژنامەنووسان دەوترێتەوە. كاروان ئەنوەر باسی لەوەشكرد، بۆ یەكەمجارە ژمارەیەك رۆژنامەنووس بۆ خولێكی رۆژنامەوانی بنێردرێنە دەرەوەی وڵات. بەشداربوانی خولەكە پێكهاتوون لە 17 پەیامنێر و خوێندكاری زانكۆ و چالاكوانی بواری میدیا، كە لە كەناڵە جیاوازەكانی راگەیاندندا لە شاری سلێمانی كار دەكەن. بڕیاریشە دوای تەواوكردنی خولەكە، بڕوانامەی بەشداریكردن ببەخشرێتە بەشداربوان.